El CAO quier sumase al dolor de les lletres d’Asturies pola muerte de Corín Tellado y Nené Losada Rico
14 | 04 | 2009 - El Conceyu Abiertu pola Oficialidá (CAO) quier llamentar la muerte de dos escritores asturianes que nos dexaron nesti fin de selmana: Corín Tellado y Nené Losada Rico. Por razones diferentes, les dos muyeres suponen un exemplu de compromisu que’l CAO quier resaltar mui especialmente.
Nené Losada Rico, escritora n’asturianu, a pesar de pertenecer a una xeneración mui anterior, axuntóse con entusiasmu al movimientu de recuperación del asturianu nel planu lliterariu y collaboró en toles iniciatives que se-y propunxeron en defensa de la llingua.
Corín Tellado, escritora en castellanu, nun tuvo nengún problema en sumase a la campaña qu’entamó’l CAO en defensa de los derechos llingüísticos pal asturianu. Tovía recordamos con cariñu la visita que l’equipu de grabación fixo a so casa y el rodaxe del videu pa la campaña. El so exemplu de compromisu ye dignu de destacar.
El CAO quier sumase con esta nota al dolor de les lletres asturianes pola muerte d’estes dos escritores exemplartes y unviar un abrazu a los sos familiares y amigos.
